Ýaňy-ýakynda «Lebapsuwhojalyk» önümçilik birleşigine Ýaponiýada öndürilýän dünýä belli «Komatsu» kysymly ekskowatorlaryň hem-de buldozerleriň hersinden 6 sanysy gelip gowuşdy.

Täze, ýokary öndürijilikli tehnikalar «Lebapsuwhojalyk» önümçilik birleşiginde öňden bar bolan dürli görnüşli 215 sany tehnikanyň üstüni ýetirer we welaýatyň suwaryş ulgamynda işleriň has-da netijeli alnyp barylmagyna ýardam eder. Şonuň bilen birlikde ýakyn wagtlarda welaýata ýene-de kuwwatly tehnikalaryň 15 sanysynyň getirilmegine garaşylýar.

Ýeri gelende welaýat boýunça suw akabalarynyň uzynlygynyň 6 müň 928 kilometre barabardygyny, şonuň 1 müň 695 kilometriniň hojalykara, 5 müň 233 kilometriniň hem içerki suw akabalardygyny belläp geçmek bolar. Welaýatyň çägindäki şor suw akabalarynyň uzynlygy hem 7 müň 925 kilometre deňdir. Täze gelip gowşan häzirkizaman tehnikalary akabalary çuňaltmak, olaryň kenarlaryny abatlamak işlerini öz wagtynda talabalaýyk geçirmekligi üpjün eder. Bu bolsa, ekin meýdanlaryny ýeterlik suw bilen üpjün etmekligiň, şonuň bilen birlikde bolsa, oba hojalyk önümleriniň bol hasylynyň kepilidir.